Қазақстандағы салық реформасы: кәсіпкерлер негізделген есептеулерді талап етеді
Қазақстан Республикасы Ұлттық кәсіпкерлер палатасында «Атамекен» кеңейтілген отырысы өтті. Оған 800-ден астам қатысушы, соның ішінде Абай облысының Кәсіпкерлер палатасы мен өңірдің бизнес-қоғамдастығының өкілдері қатысты. Басқосу барысында елдегі кәсіпкерлікті дамытуға, оның ішінде салық реформасы мен шағын және орта бизнесті қолдау шараларына қатысты өзекті мәселелер талқыланды.
ҰКП Президиумының төрағасы Райымбек Баталов салық жүйесін реформалау қажеттігін атап өтті. Ол бизнестің барлық деңгейде теңгерімді дамуы үшін маңызды. Кәсіпкерлер қауымдастығы ҚҚС мөлшерлемесін 20%-ға дейін бірден көтеруге қарсы және нақты есептеулерді талап етеді.
Сондай-ақ ҚҚС шекті мәнін түзету мәселесі қозғалды. Баталовтың пікірінше, 15 млн теңгелік шек бизнестің даму қарқынын бәсеңдетуі мүмкін, себебі әкімшілендіру күрделене түседі. ҰКП арнайы салық режимінің шегін төмендету ұсынысына да қарсылық білдірді.
ҰКП ұсынған негізгі шаралардың бірі – жалақы қорына салық жүктемесін төмендету. Ол үшін әлеуметтік салықты және жұмыс берушінің міндетті зейнетақы жарналарын алып тастау ұсынылады. Бизнес-қоғамдастық Үкіметтің барлық ұсыныстары халықаралық тәжірибеге негізделген нақты қаржылық-экономикалық есептеулерге сүйенуі тиіс деп санайды.
Аймақтық сарапшылар мен салалық қауымдастықтар жаңа Салық кодексінің жобасына қатысты алаңдаушылықтарын білдірді.
«ҚҚС – бұл тұтыну салығы. Оны көтеру тауарлар мен қызметтердің қымбаттауына әкеледі, нәтижесінде күтілетін салықтық жеңілдіктерді инфляция жойып жібереді. Жаңа салықтық төлемдер енгізіліп, кейін оның бір бөлігі ғана алынып тасталған жағдайда, бизнестің жүктемесі жеңілдемейді. Егер Қазақстанда ҚҚС мөлшерлемесі 12%-дан 20%-ға дейін көтерілсе, инфляция кемінде 4,5%-ға артады, ал ЖІӨ өсімінің қарқыны жыл сайын 2-3%-ға төмендеуі мүмкін», – деді Абай облысы кәсіпкерлер палатасы жанындағы АӨК және тамақ өнеркәсібі кеңесінің төрағасы Талғат Баймұрынов.
Отырыс қорытындысы бойынша қабылданатын шешімдердің негізділігін қамтамасыз ету үшін салалық ерекшеліктерді ескере отырып қаржылық-экономикалық есептеулер жүргізу қажет екені атап өтілді. ҰКП салық реформасына қатысты ұсыныстар жинақталған бюллетень әзірледі. Ол салалық комитеттер мен өңірлік кеңестерге жіберілді. Реформаның нақты параметрлері әлі анықталған жоқ, ҰКП «Атамекен» кәсіпкерлердің мүдделерін қорғау үшін Үкіметпен келіссөздерді жалғастырады.
Жаңартылған ақпаратқа сәйкес, ҚҚС мөлшерлемесі сараланған болады. Кәсіпкерлермен кездесуде Мемлекет басшысы салық реформасының негізгі бағыттарын белгіледі. Негізгі шешім – сараланған ҚҚС мөлшерлемесін енгізу, бұл әлеуметтік-бағдарлы экономикалық тәсілді қолдайды.
Президент Үкіметке салық саясатын айқындау кезінде кәсіпкерлердің, сарапшылардың және депутаттардың пікірлерін ескеруді тапсырды.
«Мемлекет басшысының сөзі салық реформасына кешенді әрі теңгерімді көзқарас қажет екенін растады. ҚҚС мәселесі – бизнес пен экономика үшін аса сезімтал тақырып. Әр сала ерекшелігін ескеретін сараланған мөлшерлеме – бұл әділдікке қарай жасалған қадам. Кәсіпкерлер қауымдастығы бұл шешімді қолдайды. Әсіресе, Президент Үкіметке барлық шешімдерді нақты есептеулер негізінде және бизнес, сарапшылар мен депутаттардың пікірлерін ескере отырып қабылдауды тапсырғаны маңызды. Бұл мемлекет пен бизнес арасындағы диалогтың жалғасатынын және кәсіпкерлердің дауысы естілетінін білдіреді. Біз Үкіметтің түпкілікті шешімі бюджет қажеттіліктері мен экономиканың даму теңгерімін сақтай отырып, кәсіпкерлер үшін жаңа кедергілер туғызбайтынына сенеміз», – деді Абай облысы Кәсіпкерлер палатасының директоры Максат Сүйчинов.
Маңыздысы – салық реформасы объективті есептеулерге негізделуі және барлық тараптардың мүдделерін ескеруі тиіс. Бұл бағыттағы жұмыстар жалғасуда.
Пікір қалдыру:
Пікірлер: