Ұлытау облысының құрылыс саласындағы мәселелер мен перспективалар

2025 жылғы 01 Желтоқсан

- Ұлытау облысы

115 просмотров

Ұлытау облысының Кәсіпкерлер палатасында өңірдің құрылыс саласының дамуына әсер ететін өзекті мәселелер талқыланған құрылыс жөніндегі салалық кеңестің отырысы өтті.

Отырысты ашқан құрылыс, логистика және көлік жөніндегі жаңа кеңес төрағасы, сондай-ақ Ұлытау облысы Құрылысшылар одағының төрағасы Қанат Күлмағанбетов бүгінде өңірдің құрылыс және жол-құрылыс салалары жедел шешуді талап ететін бірқатар проблемаларға тап болып отырғанын атап өтті. Талқылаудың негізгі тақырыптарының бірі — 2026 жылғы 1 қаңтардан бастап күшіне енетін жалпы салмағы 25 тоннадан асатын жүк көліктерінің қозғалысына тыйым салу туралы жаңа норма болды.

Отырысқа қатысушылардың айтуынша, бұл шара айтарлықтай экономикалық салдарға әкелуі мүмкін. Кәсіпкерлердің пікірінше, мұндай ауқымдағы шектеу мемлекеттік және жеке жобалардың тоқтауына, тасымалдау мен құрылыс материалдарының өзіндік құнының өсуіне, кәсіпорындардың банкрот қаупіне, лизингтік төлемдер бойынша берешектердің артуына, мыңдаған жұмыс орындарының қысқаруына және әлеуметтік шиеленістің күшеюіне әкелуі ықтимал. Бұл тыйым шамамен 36 500 техника бірлігін қамтиды.

Кәсіпкерлер палатасы аталған норманы енгізетін «Автомобиль көлігі туралы» ҚР Заңының 38-2-бабын алып тастау туралы ұсыныспен шығуды ұсынды.

Отырыста ТОО «Ремстрой» директоры Николай Распопов көтерген мәселе де қызу талқыланды. Оның айтуынша, қолданыстағы ережелер бойынша ірі габаритті және ауыр салмақты жүктерді тасымалдауға арнайы рұқсат қажет, алайда бұл рұқсаттың құны тым жоғары. Бұл өз кезегінде рұқсат алу бойынша «көлеңкелі» схемалардың көбеюіне жол açып отыр. Отырыс қатысушылары Автомобиль көлігі және көлік бақылауы комитетіне қолданыстағы тарифтерді қайта қарау және төмендету туралы ұсыныс жолдауды ұсынды.

Кадр тапшылығы мәселесі де назардан тыс қалған жоқ. Өңірде өнеркәсіптік нысандар мен автомобиль жолдары құрылысы үшін білікті мамандар жетіспейді. Бұл мәселені шешу мақсатында оқу орындары мен кәсіпорындардың өкілдері арасында кездесу ұйымдастырып, жүйелі ынтымақтастық орнату және сұранысқа ие мамандарды даярлауды жолға қою ұсынылды.

Сонымен қатар, құрылысшылар саланың болашақ даму бағыттарын да талқылады. Ұсыныстардың бірі — Сауда-логистикалық хаб пен Сауда-логистикалық орталықты одан әрі дамыту. Бұл өңірдегі жүк айналымының артуына, экономикалық байланыстардың кеңеюіне және жаңа жұмыс орындарының ашылуына ықпал етуі тиіс.

Отырыс қорытындысы бойынша, өңірдің құрылыс саласы кешенді шешімдерді және мемлекет, бизнес пен білім беру мекемелері арасындағы тығыз ынтымақтастықты қажет ететіні атап өтілді. Қатысушылар кеңесте айтылған ұсыныстар салалық мемлекеттік органдардың назарын аударып, Ұлытау облысының құрылыс саласының тұрақты дамуына серпін береді деген үміт білдірді.