Мемлекет пен сала арасындағы диалог: фармацевтикалық және медициналық өнеркәсіпті дамыту тұжырымдамасы жобасы бойынша кеңес өтті
Кездесудің негізгі тақырыбы Қазақстан Республикасының 2026–2030 жылдарға арналған фармацевтикалық және медициналық өнеркәсіпті дамыту тұжырымдамасы жобасын талқылау болды
Кеңеске қатысушылар Тұжырымдаманың фармацевтикалық және медициналық өнеркәсіпті дамыту үшін айрықша маңызға ие екенін атап өтіп, оның саладағы мемлекеттік саясаттың басымдықтарын, жаңғырту бағыттарын және орта мерзімді кезеңге арналған тұрақты даму тетіктерін айқындайтын жүйелі стратегиялық құжатқа айналуға тиіс екенін жеткізді.
Сонымен қатар ұсынылған Тұжырымдама жобасының қазіргі редакциясында нақты бекітілген мақсаттар, өлшенетін индикаторлар және отандық өнеркәсіптің даму мен жаңғырту деңгейін объективті бағалауға мүмкіндік беретін нақты іс-шаралар жеткіліксіз екені айтылды.
«Қазақстан Мединдустриясы» Отандық медициналық бұйымдарды, медициналық өнімдерді өндірушілер одағы басқарма төрағасының кеңесшісі Серікбол Мусинов Тұжырымдаманы жалпыұлттық индустрияландыру жоспарларымен үйлестіру, сондай-ақ Қазақстан Республикасында дәрілік заттар мен медициналық бұйымдар өндірісін жергіліктендірудің басым бағыттарын неғұрлым терең пысықтау қажеттігін атап өтті.
«Тұжырымдама FDA және EMA сияқты озық халықаралық тәжірибені, сондай-ақ жасанды интеллект технологияларын пайдалану мүмкіндіктерін ескере отырып, дәрілік заттар мен медициналық бұйымдарды тіркеу және сараптау саласындағы реттеуші саясатты түбегейлі жаңғыртуды көздеуге тиіс», — деді ол.
Ұсыныстар қатарында Тұжырымдамада дәрілік заттар мен медициналық бұйымдарға арналған блоктарды бөлу, сараптамалық ұйым қызметін кешенді жаңғырту, сондай-ақ қазақстандық тауар өндірушілердің қатысуымен инвестициялық жобаларды іске асыру қажеттілігі айтылды.
Сондай-ақ қазақстандық өндірушілерді кооперациялау, технологиялық және шикізаттық қолдау көрсету үшін мамандандырылған технопарктер құру, бұдан бөлек ұлттық сатып алу режимінен алып тастауға жататын дәрілік заттар мен медициналық бұйымдардың тізбесін қалыптастыру мәселесіне ерекше назар аударылды.
Қазақстан Республикасы Денсаулық сақтау министрлігінің фармацевтикалық және медициналық өнеркәсіпті дамыту департаментінің директоры Аслан Кинаятов ұлттық режимнен алып тастау мәселесі бұған дейін Қаржы министрлігі тарапынан қолдау таппағанын хабарлады.
«Осыған байланысты, сатып алуларда отандық тауарларға басымдық беру тетіктерін қолдану бойынша, оның ішінде ЕАЭО елдерінің халықаралық тәжірибесін зерделеп, дәрілік заттар мен медициналық бұйымдарды сатып алу қағидаларына тиісті өзгерістер енгізу мүмкіндігін қарастырған жөн. Қазіргі уақытта фармацевтикалық және медициналық өнеркәсіпке кураторлық ету функцияларын ҚР Денсаулық сақтау министрлігінен ҚР Өнеркәсіп және құрылыс министрлігіне беру мәселесі ашық күйінде қалып отыр», — деді Аслан Кинаятов.
Балама нұсқа ретінде ҚР Денсаулық сақтау министрлігі құрылымында фармацевтикалық және медициналық өнеркәсіпті дамыту саласында қажетті өкілеттіктері бар жеке бөлімше құру ұсынылды.
Дәрілік заттар мен медициналық бұйымдарды сараптау ұлттық орталығының халықаралық ынтымақтастық, интеграция және заңнаманы үйлестіру басқармасының басшысы Дәулет Сәбденалиев 2028 жылдан бастап дәрілік заттар мен медициналық бұйымдарға сараптама жүргізу үшін орталықтың жаңа зертханаларын салу жоспарланып отырғанын хабарлады.
Өз кезегінде Инновациялық-индустриялық даму альянсының президенті, Dolce Group компаниясының иесі Елена Ли қазіргі таңда Қазақстан аумағында дәрілік заттар мен медициналық бұйымдардың жекелеген сынақ түрлерін жүргізе алатын ғылыми зертханалар бар екенін айтып, оларды Дәрілік заттар мен медициналық бұйымдарды сараптау ұлттық орталығының сараптамалық рәсімдеріне тарту мүмкіндігін қарастыруды ұсынды.
«Сондай-ақ Тұжырымдамада Еуропалық одақ стандарттарына сәйкес өнімді сынау мен сертификаттауды жүзеге асыра алатын, CE таңбасын алу үшін аккредиттелген сынақ зертханалары мен сәйкестікті бағалау орталықтарының желісін құруды қарастыруды ұсынамыз. Бұл медициналық бұйымдардың экспорттық әлеуетін дамыту үшін айрықша маңызға ие. Сонымен бірге экспортты мемлекеттік қолдау, R&D ресурстарын дамыту және CE мен FDA халықаралық сертификаттарын алу қажет» — деп атап өтті ол.
Бизнес өкілдері сондай-ақ еліміздің өңірлерінде фармацевтикалық және медициналық өнеркәсіпті кластерлік дамыту мәселесінің маңыздылығын жеткізді.
Кеңес қорытындысы бойынша фармацевтикалық бизнес-қоғамдастықтан түскен ескертулер мен ұсыныстарды ескере отырып, қатысушылар Тұжырымдама жобасын қайта қарау қажеттігі жөнінде ортақ пікірге келді. Қазақстан Республикасы Денсаулық сақтау министрлігінің өкілдері сындарлы диалогты жалғастыруға және бизнес ұсыныстарын жан-жақты қарастыруға дайын екендерін білдірді.
Пікір қалдыру:
Пікірлер: