Бүгін қазақстандық үш көлік жүргізуші Польша шекарасынан өтті
«Атамекен» ҰКП, ҚР Индустрия және инфрақұрылымдық даму, сондай-ақ ҚР Сыртқы істер министрлігінің бірлесе атқарған жұмысының арқасында қазақстандық жүк көлік жүргізушілері Украинадан елге қарай шықты.
Ұлттық палата Украинадағы жағдайдың салдарынан сол елде қалып қойған көлік жүргізушілерінен мәлімет жинады. Осы уақытқа дейін 55 жүргізуші көмек сұрап хабарласты. Соның 19-ына көмек көрсетілді. Үшеуі Польша шекарасынан өтсе, 8 жүргізуші Троебортное өткізу бекеті арқылы Ресей аумағына жетті. Тағы 8 жүк көлігі Молдавияға өтті, соның ішінде 4 жүргізуші – Түркия азаматы. Олар Украина және Молдавия шекарасы арасындағы бейтарап аймақта тұр.
«Біз күш біріктіріп, отандастарымызға көмектесе алғанымызға қуаныштымыз. Қазіргі кезде қазақстандық тарап Польшаның инфрақұрылым және даму министрлігінен ресми хат алды. Бізге ресми жауап берілді және отандастарымыз – жүк көліктерінің жүргізушілеріне ПТР-тест, визасыз шекарадан өтуге мүмкіндік берілді. Қалған отандастарымыз да Польша және басқа елдер арқылы елге аман-есен оралуы үшін бұл жұмысты жалғастырамыз», – деді «Атамекен» ҰКП Логистика және тасымалдау департаментінің директоры Мұрат Амрин.
Ұлттық палата Қазақстанның Польшадағы консулы Бекзат Сәбитұлына, сондай-ақ Қазақстанның Украина, Ресей және Беларусьтегі өкілдіктеріне, ҚР Индустрия және инфрақұрылымдық даму министрлігіне алғыс білдіреді.
Ұлттық палата Украинадағы жағдайға байланысты жедел чат ашып, онда жүргізушілер 24/7 режимде өзінің орналасқан жері, жергілікті жағдай және ықтимал маршруттар туралы ақпарат беріп жатыр.
Қазіргі кезде 36 көлік жүргізуші Украина аумағында қалып отыр.
Пікір қалдыру:
Пікірлер: